سياسة الخصوصية
تايتن منصة تضيف لبثك المباشر شخصية ثلاثية الأبعاد وتنبيهات ولوحات تفاعل. هنا نوضح وش البيانات اللي نتعامل معها وليش.
البيانات اللي نحفظها عنك (صاحب الحساب)
- اسم المستخدم ويوزر تيك توك، وكلمة المرور مشفّرة (ما نقدر نشوفها).
- رقم الواتساب أو الإيميل لو أضفتها، ونستخدمها بس للتواصل معك عن الدفع والدعم.
- إعداداتك: الشخصية والتنبيهات والويدجتات والمعلومات اللي تكتبها عن بثك.
- الفيديوهات اللي ترفعها للتنبيهات.
- سجل الباقة والرصيد وطلبات الشحن.
بيانات البث والمشاهدين
- نقرأ أحداث بثك العامة من تيك توك، ومن تويتش وكيك لو فعّلت دمج الشات: الرسائل والهدايا والإعجابات والمتابعات، مع الاسم الظاهر واليوزر والصورة العامة للمشاهد.
- نحفظ لكل مشاهد ملخص بسيط لحسابك فقط: عدد زياراته ورسائله ودعمه، واسمه لو قاله للشخصية بنفسه. تقدر تمسح هالذاكرة كاملة من الاستوديو بأي وقت.
- لوحات التوب تنحفظ لين يبدأ بث جديد.
الذكاء الاصطناعي
لما تكون الردود الذكية مفعّلة، نرسل آخر رسائل الشات ومعلومات بثك لخدمة Google Gemini عشان تكتب رد الشخصية. ما نرسل كلمات مرور أو بيانات تواصل.
جهات خارجية نتعامل معها
- تيك توك وتويتش وكيك: مصدر أحداث البث.
- Euler Stream: خدمة تساعد في الاتصال ببث تيك توك.
- Google: الردود الذكية (Gemini) والخطوط.
- مزوّد الاستضافة اللي يشغّل خوادمنا.
- بوابة الدفع لما يتوفر الدفع الإلكتروني.
ما نبيع بياناتك ولا نعطيها لأحد لأغراض إعلانية.
الحفظ والحماية
- بياناتك على خوادم محمية، وفيه نسخة احتياطية يومية تنحفظ 14 يوم.
- جلسة الدخول تنحفظ في متصفحك، ورابط OBS خاص فيك وتقدر تجدده بأي وقت.
حقوقك
تقدر تطلب نسخة من بياناتك، أو تصحيحها، أو حذف حسابك وكل بياناته، بالتواصل معنا. ونرد خلال مدة معقولة حسب نظام حماية البيانات الشخصية في المملكة.
الشروط والأحكام
الخدمة
تايتن يقدم أدوات للبث المباشر: شخصية ثلاثية الأبعاد، وتنبيهات، ولوحات توب، وأهداف، وتصويت وألغاز، وردود آلية على الشات، تضيفها لبثك عن طريق OBS.
حسابك
- أنت مسؤول عن حسابك وكلمة مرورك ورابط OBS الخاص فيك.
- لازم تستخدم يوزر حسابك أنت، وتلتزم بشروط تيك توك وتويتش وكيك.
الاستخدام المقبول
- ممنوع استخدام المنصة في محتوى مخالف للأنظمة أو مسيء أو مضلل.
- ممنوع رفع فيديوهات ما تملك حقها.
- ممنوع محاولة اختراق المنصة أو إرهاق خوادمها.
نقدر نوقف أي حساب يخالف هالشروط.
الردود الآلية
ردود الشخصية تنكتب آلياً، بقوالب جاهزة أو بالذكاء الاصطناعي، وممكن تكون غير دقيقة أحياناً. فيه فلتر للألفاظ، وتقدر تضيف كلمات ممنوعة أو توقف الردود بأي وقت. وتبقى أنت المسؤول عن محتوى بثك.
الباقات والدفع
- التجربة: كل حساب جديد ياخذ 7 أيام مجاناً فيها مميزات البرو، بدون بطاقة. وبعدها يصير على الباقة المجانية (التنبيهات بس) لين تختار باقة. وعدد التنبيهات اللي تقدر تسويها يختلف حسب الباقة.
- الباقة المجانية مجانية، والباقات المدفوعة (الأساسي والبرو) مدتها 30 يوم بالريال السعودي حسب الأسعار والمميزات المعروضة في صفحة الأسعار. وتتفعل بعد ما نتأكد من وصول المبلغ. والشخصية والردود الذكية في البرو بس.
- التجديد: الاشتراك ما يتجدد لحاله. تطلب التجديد من الاستوديو متى ما بغيت، والأيام الجديدة تنضاف على الأيام الباقية. ولو خلصت المدة وما جددت، يرجع حسابك للمجاني وتبقى إعداداتك كلها.
- الانتقال بين الباقات: لو اشتركت في باقة ثانية وباقي لك أيام، قيمة الأيام الباقية تنحسب لك أيام في الباقة الجديدة (حسب فرق السعر).
الردود الذكية والرصيد
- الردود اليومية: لباقة البرو (والتجربة) عدد ردود ذكية باليوم. تتجدد كل يوم، واللي ما تستخدمه ما ينتقل لليوم اللي بعده.
- الرصيد المشحون: ردود إضافية تشتريها بأي وقت. ما ينتهي أبداً، ويُستخدم بس بعد ما تخلص ردودك اليومية، ويبقى معك حتى لو تغيّرت باقتك، وتستخدمه متى ما كانت باقتك فيها ردود ذكية.
- وش ينحسب: كل جملة تكتبها الشخصية بالذكاء الاصطناعي تنحسب رد واحد: لما ترد على الشات، أو تشكر على هدية بقيمة 1,000 عملة وفوق، أو تفتح سالفة لما الشات هادي. أما الردود الجاهزة (السلام والترحيب والضحك وشكر الهدايا الصغيرة) فما تنحسب.
- لما يخلص كل شي: الشخصية ما تسكت، تكمل بالردود الجاهزة لين يتجدد يومك أو تشحن. ونبلغك في الاستوديو قبل ما تخلص ردودك.
- الاستخدام العادل: في التجربة، المتابع الواحد ياخذ 5 ردود ذكية بالساعة كحد أقصى، عشان محد يستنزف ردودك. وفي البرو ما فيه حد لكل متابع، والشخصية توزّع ردودها على الشات بنفسها. وأنت ومشرفينك مستثنين من أي حد.
- الرصيد مو فلوس: ما يتحول لمبلغ نقدي، وما ينتقل لحساب ثاني.
- ممكن نعدّل الأسعار أو الحدود، ونبلغك قبل ما يطبق التعديل على اشتراكك. والرصيد اللي شحنته قبل التعديل يبقى مثل ما هو.
توفر الخدمة
نسعى إن الخدمة تشتغل دائماً، لكنها تعتمد على منصات خارجية مثل تيك توك. ولو غيّرت أي منصة طريقة عملها، ممكن تتأثر بعض المزايا مؤقتاً لين نصلحها. ما نضمن إن الخدمة تشتغل بدون انقطاع.
حدود المسؤولية
حدود مسؤوليتنا ما تتجاوز المبلغ اللي دفعته لنا خلال آخر شهر.
النظام المطبق
تخضع هالشروط لأنظمة المملكة العربية السعودية.
سياسة الاسترجاع والإلغاء
- الإلغاء: الاشتراك ما يتجدد تلقائياً، فما تحتاج تلغي شي. إذا ما طلبت التجديد، يبقى شغال لين نهاية الـ 30 يوم ويرجع مجاني.
- الدفع المكرر أو الغلط: لو دفعت مرتين أو دفعت مبلغ غلط، تواصل معنا ونرجعه لك كامل.
- استرجاع الاشتراك: لو طلبت خلال 7 أيام من أول دفعة وما استفدت من مزايا الباقة المدفوعة، نرجع لك المبلغ كامل.
- رصيد الردود: الرصيد اللي ما انستخدم منه شي، نقدر نسترجع مبلغه خلال 14 يوم من الشراء. وبعد ما تبدأ تستخدمه، ما يسترجع.
- طريقة الاسترجاع: نرجع المبلغ بنفس طريقة الدفع خلال 14 يوم عمل من الموافقة.
- لو صار عندنا عطل منعك من الاستفادة من الخدمة فترة طويلة، تواصل معنا ونعوضك.
التواصل
لأي سؤال عن الخصوصية أو الشروط أو الاسترجاع: